Dövlətin marağı,
təhlükəsizliyi mövzu olanda hökumətin yanında ol deyirlər.
Baxaq, necə olur
dövlətin təhlükəsizliyi və mən necə onun yanında olmalıyam və ya belə hal baş
verdikdə ola bilmişəmmi indiyə kimi?
Son 3 ildə baş
verən bir neçə hadisəyə nəzər yetirək.
2012 ci il. “Evrovision” mahnı yarışması keçirilir Bakıda. Bayıl
qəsəbəsində, “Basin” küçəsində insanlar evlərindən çölə atılır, təzyiqə, təqibə
məruz qalır.
“Evrovision keçirdirik, ölkəmizi dünyaya tanıdırıq” deyərək büdcəni talan
edir, insanlara divan tuturlar.
Müxalifət olaraq meydandayıq, vətəndaşların haqlı etirazını dilə gətirməklə
yanaşı, həm də gələcəyə doğru yaşanacaq iqtisadi böhranı əngəlləmək istəyirik,
büdcənin talan edilməsi sonucunda irəli illərdə iqtisadi böhran yaşayacağıq
deyirik, hayqırırıq…
Nəticədə həbslər, təqib və təzyiqlər…
2013 cü il. Artıq 1 ildir həbsdəyəm. Yəni “dövlət təhlükədə olanda
hakimiyyətin yanında ol” deyiminə birə-bir “əməl” edirəm. Bir başa MTN (Milli
Təhlükəsizlik Nazirliyi) tərəfindən həbs edilmişəm və bununlada hökumətin
təhlükəsizliyi adına ən üst qürumun “podvalında” saxlanılmaqla, deyilən cümləni
nöqtə vergülünə kimi yerinə yetirirəm. Daha nə etməliyəm? Yanında deyil, bir
başa içindəyəm, “padvalı” olsa belə.
2014 cü il. İqtisadiyyatda geriləmələr müşahidə edilir, ciddi böhranın
siqnalları gəlir. Hökumət sinəsini döyür, Olimpiada keçiririk deyir.
Müxalifət meydandadır. Hayqırırıq, büdcəni talamaqdan heç olmasa bir
müddətlik əl çəkin, bu ölkəni uçuruma aparırsız, Olimpiada adlı şoudan vaz
keçin deyirik…
….. eyni mənzərə.
Növbəti ilin əvvəlindən hökumət, bir başa dictator Əliyev şəxsən çıxış edir
və Olimpiadanın uğurundan tut, artan iqtisadi göstəricilərdən danışır, deyir
manat dünyada ən sabit valyutadır, hər kəs pulunu manatla saxlasın…
Bir neçə gün sonar manat 34 % dəyərdən düşür və böhran başlayır. Ərzaq
bahalanır, işsizlik, yoxsulluq, bank kreditləri insanların boğazına kəndir,
üstünə benzin olub tökülür – yandırır diri-diri, körpülərə çıxır və intiharlar…
Müxalifət xalqa məlumatlar verir, bilgilərini bölüşür, hətta “talana son”
adlı mitinqlə xalqı hakimiyyətin talama siyasətinə son deməyə çağırır. Xalq
susur, “ən azından sabitlikdir”, “allah belə istəyib”, “allah hər xalqa ona
layiq basic verir”, “dolların qalxmasının xalqa təsiri yoxdur”, “bu günümüzə
şükür” və bu kimi 20 illik hazır şüarları səsləndirir.
Nəticədə yenə də dövlətin təhlükəsizliyi üçün bizlər oluruq ortada. Deyirik
bunun yolu azad ticarət, azad məhkəmə və.s –dir. Yəni yenə də dövlətin
təhlükəsizliyi üçün program sunuruq.
Bir sözlə, yanında oluruq dövlətin. Hətta bayaq çəkdiyim misaldakı kimi,
bir başa içində - İlqar Məmmədov, İntiqam Əliyev, Rəsul Cəfərov və.s siyasi
məhbuslarla (hansı ki, bu adamlar
azadlıqda olarsa, onlara imkan verilərsə bu ölkəni böhrandan çıxaracaq
şəxslərdir)…
Amma yox, axı biz “ünsürlərik”, ölkənin inkişafını gözümüz götürmür..
2015 ci il. Bakıda “Avropaq Olimpiadası” keçirilir. Bu oyunlara 8 milyard
vəsait ayrılıb. Yəni büdcənin 40% qədər.
Dedik etməyin, eyləməyin, xalqa bunca zülm etmək, talamaq olmaz, acı
nəticələri olacaq. Dedilər inkişafımızı gözünüz götürmür, “gör nə gözəl açılış
oldu, hətta Alim Qasımov xalça ilə uçdu”, “milyonluq Rihanna oxudu” və.s
İlin sonudur, ikinci devalvasiya. Artıq Azərbaycan manatı 100 % dəyər
itirib, dünyada ilin ən pis valyutasıdır. Ölkədə aclıq, səfalət, işsizlik,
kredit borcları, çarəsizlik insanları ölümə sürükləyir…
Yenə də dövlətin təhlükəsizliyi üçün biz varıq, filan –filan islahatları
edin, ölkə batır, xalq yazıqdı deyirik.
… yenə də səs yoxdur.
Elə bu ərəfələrdə indiyə kimi ağızlarda dolaşan “dövlətin təhlükəsizliyi
mövzu olanda hakimiyyətin yanında olmaq lazım” mifi də MTN lə bərabər ləğv
edilir, Mahmudovun 20 milyardlıq sərvəti ortaya çıxır, onun generalı özünü “asır”,
“onun gizli həbsxanası varmış” və.s –lər meydandadır.
Buna rəğmən necə və kimin yanında olaq?
Dövlət qaldımı? Axı hələ 93 cü ildə dövləti Rusiyaya satmısız.
Dövlətin təhlükəsizliyinin təminatçısı quldurluq edib illər boyu və siz
onun yanında ol deyirsiz. Quldurun yanında olmağı da quldurun ortağı istəyər.
Və son olaraq Ermənistanın “Monte Melkonian Cyber Army” hakker qrupu bir
neçə gün öncə “ASAN” xidmətin bazasını oğurlayıb. Dövlətin bir neçə gün sonar bundan
xəbəri olub. Bu nə deməkdir bilirsiz? Yəni ölkənin bütün məlumatlarının
toplandığı bazanı rahat şəkildə əldə ediblər və “şanlı”, “regionda lider dövlət”in
bundan heç xəbəri belə olmayıb. Nə məlumdur ki, həmin xakker qrupu Müdafiə
Nazirliyinin də bazasını oğurlamayıb?
Bəs bizim hərbi hissələrimizi gəzən, əsgərlə yemək yeyir şəkilləri
paylaşaraq özünü pop ulduzu kimi aparan, tək qüsuru lazımı gözləmək olan Zakir
Həsənovun bundan xəbəri varmı görəsən?
Bunca sualın, yaşananların içində hələ də “dövlətin təhlükəsizliyi” deməyə
üz lazım.
Zatən yanındayıq, içindəyik, “padvalına” kimi görmüşük və görürük.
Bizlər çox çalışdıq “yanında” olmağa, siz dışladınız.
Siz öncə bir təhlükəsizlik sözünün anlamını dərk edib çözün.
No comments:
Post a Comment