"Təhsil, mütaliə pis örnək olur".

"Təhsillə, mütaliə ilə məşğul olmaq pis örnəkdir". Rəis müavini

  14 saylı Cəzaçəkmə Müəssisəsində saxlandığım zaman bütün hüquqi proseslərə əməl etdim. Qanunların işləmədiyini, siyasi sifarişlərin hökm sürdüyünü isbat üçün boş vaxtım çox idi. Hələ ki, siyasi məhbus isən sənin üçün bütün yollar bağlı olur. Yalnız adminstrasiyanın qərarı lazım, sənin haqqında hər hansı qanunun tətbiqi üçün.

  Dəfələrlə Qaradağ rayon Məhkəməsinə müraciət etmiş, qanunların icazə verdiyi şərti azadlıq və ya məntəqə tipli CÇM-yə köçürülməyim haqda ərizəmin təmin edilməsini tələb etmişəm. Hər dəfəsində ərizəm təmin edilməyib, apellyasiya şikayəti vermişəm - o da eyni mərkəzdən idarə edilən qürum olduğundan təmin edilməyib. 

  Bir gün təkrar məhkəməyə müraciət etdim. 14 cü kolonun rəis müavini Natiq Hacıyev də məhkəməyə barəmdə mülahizə yazmalı idi, yazdı. Sifarişə əsasən mülahizədə məni pisləməli idi. O bunu məharətlə bacarırdı. Nə də olsa bu rejimin bir parçası idi və yalan, böhtan onun həyat tərzi idi. O sifarişi can-başla yerini yetirirdi. Aşağıda gördüyünüz şəkil həmin mülahizədən bir hissədir. Qırmızı xətt çəkdiyim cümlə isə yalan yox, biyabırçılığın göstəricidir. Rəis müavini mülahizəsində təhsilə yüksək münasibəti, mütaliəni mənfi hal kimi qiymətləndirirdi.

14 saylı CÇM rəis müavini N.Hacıyevin barəmdə yazdığı mülahizə. 16.08.2013

 Bu cümlə ilk öncə məni yaxşı mənada təəccübləndirmişdi. Barəmdə heç olmasa bir yaxşı cümlə işlətdiyini düşünmüşdüm. Amma Natiq Hacıyev "sevincimi" ürəyimdə qoydu (bu haqda aşağıda qeydim var)....

                                                             * * *

  Şəkildə gördüklərinizə, barəmdə olan "ittihamlara" biraz əlavələrim, daha doğrusu cavabım var. Hansı ki, bu cavabı elə Natiq Hacıyevin də iştirak etdiyi həmin məhkəmədə bildirmişdim.

Rəis müavini yazır ki, "məhkumun əməyə münasibəti qənaətbəxş deyil".

- Qeyd edim ki, saxlanıldığım müəssisə Əmək Müəssisəsi deyil, Cəzaçəkmə Müəsisəsidir. Burada məndən hər hansı əmək tələb edilə bilməz.

Daha sonra "müəssisənin abadlaşdırılması və məhkumların mədəni -məişət şəraitinin yaxşılaşdırılması işlərində iştirak etməyə həvəs göstərmir" deyə Hacıyev yazıb.

- Müəssisənin abadlaşdırılması, məhkumların mədəni-məişət şəraitinin yaxşılaşdırılması mənim (məhkumun) yox, müəssisə rəisinin işidir. Mən sadəcə məhkumam və kolonu abadlaşdırmaq kimi vəzifəm yoxdur.

  Mülahizədə deyilir ki, "cinayətini etiraf etmir, peşmançılıq hissi keçirmir, məhkəmə qərarı ilə razılaşmır və əsassız həbs olunduğunu bildirir".

- Bəli, belədir. Niyə razılaşmalıyam, siyasi fəaliyyətimdən dolayı sifarişli həbs edilmişəm. Nə üçün peşman olmalıyam, vətənimi, xalqımı sevdiyim üçün? Yox, düz demişəm, peşman deyiləm. Hökm oxunanda da bunu demişdim, sözümün üstündəyəm.

Sonra Natiq Hacıyev ən biyabırçı açıqlaması ilə hakim, prokuror və məni güldürə bilir. Belə ki, o qeyd edir: "məhkumun təhsilə münasibəti müsbətdir, müntəzəm olaraq müəssisənin kitabxanasında mütaliə ilə məşğul olur və mətbuatla maraqlanır".

N.Hacıyev bunu müsbət hal kimi yazıldığını düşünən hakim və prokurora tez şifahi açıqlama verir. O bildirir ki, "bu müsbət hal deyil, əksinə mənfi haldır. Məhkum bütün günü kitabxanada, axşam isə öz yataq yerində ancaq mütaliə ilə məşğul olur. Dəstə kollektiv şurası (bu ad yalnız formal xarakter daşıyır, bunu məhkumluq yaşayan hər kəs yaxşı bilir) işlərində iştirak etmir. Digər məhkumlara qarışmır və onlara yalnızlığı, kitaba qapanmağı aşılayır. Ancaq məhkum digər məhkumlara qaynayıb qarışmalı, birgə yaşayış qaydalarına əməl etməli, onlarla sıx ünsiyyətdə olmalıdır".

Bunu Ədliyyə Polkovnik-leytenantı Natiq Hacıyev deyir. Bu rəis müavininin, min nəfərə yaxın məhkumun tərbiyyəvi işlər üzrə səlahiyyətlisinin açıqlamasıdır. O adama görə bu açıqlaması normaldır. Çünki bu adam Pentensiar Xidmətindən 14 cü kolona göndərilən 360 ədəd kitabı maşınına yığıb aparıb satan adamdır. Əlbəttə məhkumun mütaliə etməsi onu narahat edəcək. Bu həm də diktatura rejiminin maraqları ilə üst-üstə düşən siyasətdir. İnsanlar oxumasın. biliyini artırmasın və.s.

Daha sonra Hacıyev bildirir ki, 02.05.2013 tarixində, əvvəllər dəfələrlə şifahi xəbərdarlıq edilməsinə baxmayaraq, icazəsiz olaraq yataq yerində yatdığıma görə "xəbərdarlıq" edilmişdir.

- Xatırladım ki, Cəzaların İcrası Məcəlləsində 10 cu maddə (məhkumların əsas hüquqları) 2 ci bənd 2də buna aid maddə nəzərdə tutulub. Belə ki, məhkumun günorta saat 13:00 - 16:00 arası istirahət hüququ var. Sadəcə bu hüququmdan istifadə etmişəm və sona kimi də etdim. Ancaq bu "zon"da rəisin biznesini pozmağım kimi dəyərləndirilirdi. Çünki həmin hüquqdan istifadə edən, yəni günorta öz yataq yerində istirahət edən məhkumlardan 1 manat məbləğində rüşvət alınırdı. Yəni öz hüququnu məhkuma pul isə satırdılar. Mən isə yatır və digər məhkumlara bunun qanunla icazəli olduğunu bildirirdim. Mənim yatmağımı görən digər məhkumlarda yatırdı, o zaman isə onlardan rüşvət almaq olmurdu. çünki məni göstərib "o niyə yatır və ona söz demirsiz" deyə bilirdilər.

 PS. Türmə xatirələri bir ayrı maraqlı olub. Bu gün o günlərə baxdıqda, gündəliklərimi oxuduqda daha necə gülünc məmurların olduğunu xatırlayıram.

Rəsul Mürsəlov.

"Təhsil, mütaliə pis örnək olur". » QaynarXeber.Az

Zaqatala xalqına müraciət.



Siyasi fəal Rəsul Mürsəlov doğulub böyüdüyü Zaqatala şəhəri əhalisinə müraciət etdi.

QaynarXeber.Az saytına ünvanlanan müraciətdə xalqa seçkini boykot çağırışı yer alır və gənc fəal xalqa bunun açıqlamasını verir.

Müraciəti olduğu kimi təqdim edirik.

Əziz Zaqatalalılar!

Sizlərə müraciət edirəm.

1 noyabr Parlament təyinatı günündə (bəli seçki yox, bu gün təyinat günüdür) seçki dairələrinə getməməyinizi, sizin səsinizin onsuzda heç bir əhəmiyyəti olmayacağını bildirirəm ki, sizlərin bunun bilincində və illər boyu şahidi olduğunuzu düşünürəm.

Bu hakimiyyət sizləri zatən saya salmır ki, sizin səsinizi də saya salsın. Boş yerə özünüzə əziyyət verib seçki dairələrinə getməyin, saxtakarlığı boykot edin.

Nəzərinizə çatdırım ki, Zaqatala 110 və 111 saylı seçki dairələri üzrə hakimiyyətin, bir başa prezident İlham Əliyevin təyinatına əsasən, sırası ilə Elşən Musayev və Kamilə Əliyeva adlı iki şəxs artıq təyin edilmişdir. Yəni sizlərin seçki dairəsinə getməyinizin heç bir anlamı yoxdur və gedəcəyiniz təqdirdə öz -özünüzə qarşı hörmətsizlik etmiş olacaqsız. Belə ki, seçki dairəsi üzrə təyinatın olduğunu bildiyiniz halda səs verməyə getməyiniz özünüzü aldatmaqdan başqa bir şey deyil. Çünki mövcud hakimiyyət sizləri saya salmır və bu durumda sizi puldan üstün hesab edərək səslərinizi də saya salmayacaqdır. Onu da yaxşı bilirsiniz ki, 2011 ci ilə ortaya çıxan gizli video çəkimlərlə parlament yerlərinin 1-1.5 milyon dollara satılması, bunun başında bir başa prezidentin durması təsdiqini tapmışdır.

Buradan isə aydın olur ki, hakimiyyət öz xalqından çox, cibini düşünür. Bu hakimiyyətin xalqdan çox cibini düşünməsinə sadəcə bir misaldır - mövzumuz seçki olduğundan yalnız bu fikirlə məsələni uzatmıram.

Hörmətli Zaqatalalılar!

Son Parlament seçkilərində - 2010 cu ildə Zaqatala 111 saylı seçki dairəsindən təyin olunmuş Kamilə Əliyevanı tanıyırsınızmı? Düşünürəm ki, cavabınız XEYR olacaqdır. Çünki həmin saxta deputat özü belə mətbuata açıqlamasında, Zaqatala deputatı olmasına rəğmən seçildiyi (əslində təyin edildiyi) seçki dairəsi üzrə heç vaxt Zaqatalaya getmədiyini, seçicilərlə görüşmədiyini və bu işdə (yəni seçicilərlə görüşməkdə) maraqlı olmadığını bildirib. Bəs belə olan halda saxta deputatın kimə, necə, nə kimi faydası ola bilər? Bu saxtakar qadın təkrar hansı üzlə Zaqataladan təyin olunmaq istəyir? Çünki sizlər heç vaxt ona qarşı etiraz etməmiş, saxtakarlığını üzünə vurmamışsınız. Əslində məsələ Kamilə Əliyeva kimi cılız insanlarda deyil, bir başa hakimiyyət başında duran İlham Əliyevdədir. Ancaq bu gün İlham Əliyevi deyil, onun maşası olaraq xalqa divan tutan, talayan və heç zaman onları özünə bərabər bilməyərək, onlarn içinə çıxmağı özünə sığışdırmayan Kamilə Əliyeva kimilərdən danışaq. Kiçikdən böyüyə gedək.

Onun kimi də Elşən Musayev. Bu adam kimdir, bilirsinizmi? Bu adam şər, böhtan hesabına Lider TV kanalında xalqını sevən, onların dərdinə yanan və şərik çıxan insanları şərləməklə İlham Əliyevə yaltaqlanan bir kimsə. Bu adam bütün mənliyini sataraq Əliyevə yaltaqlanır ki, sizlərin, xalqın başı üzərindən biznes mərkəzi olan parlamentdə mandatını qoruya bilsin. Bu yaltaqlıq və anti-xalq çıxışlarından dolayı ilham Əliyev onu da digər yaltaqlar kimi "mükafatlandırır" və bu il təkrar parlamentə təyinatını imzalayıb. Bu şər-xata Elşən Musayevi Zaqatala üzərindən deputat edir. Çünki Zaqataladan daha çıx cibini dolduracaq və yuxarıya haqq çatdıra biləcəkdir. Əlbəttə arsız adamlar daha çox xalqdan istifadə edə bilər və Musayev də bu tiplərdəndir.

Gəlin birlik olaq, bir olaq. Hər kəs dərindən düşünsün. Artıq itirəcək nəyiniz var? Hər biriniz borc içində, bank kreditinə bağlı yaşamırsınızmı?

Bizləri bu durma salan Əliyev rejiminin saxta parlament oyununda iştirak edərək nədən onun saxta ömrünü uzadaq ki? Bəli biz boykot etsək belə saxtakar rejim təyinatı üzərə adlarını çəkdiyim Elşən Musayev və Kamilə Əliyeva parlamentə təyin ediləcək. Ancaq bizlər hər birimiz öz vicdanımız qarşısında bu saxtakarlıqda iştirak etmədiyimizi biləcəyik. Bizlər bu BOYKOTLA hakimiyyətə hələ də ayaqda qaldığımızı, xalq bir olarsa hər şeyə qadir olduğunu sübut edək.

İcazə verək ki, özləri çalıb, özləri oynasın. Yəni hakimiyyətə xalqdan səs almadıqlarını, öz saxtakarlıqları ilə mandat verdiyini üzlərinə vuraq.

Sizlərdən istəyim sadədir - 1 noyabrda əziyyət çəkib saxta parlament təyinatına şərik olmayın. Boş yerə seçki dairələrinə getməyin və özünüzü əzdirməyin. Gedəcəyiniz, səs verəcəyiniz adam seçilməyəcək, seçki saxtakarlaşdırılacaqsa, nədən boşuna həm əziyyət, həm də sayğısızlıqdan acıq çəkəsiniz ki?

1 noyabr parlament təyinatına sayılı günlər qalır. Düşünün və bir daha düşünün. Kütləvi şəkildə seçkilərə getməkdən imtina edin. Bu imtinanı hər bir şəxs iki nəfər tanıdığına desin, o iki nəfər də hər biri daha iki nəfərə deyərsə bu daha geniş yayılacaq və Zaqatala xalqı olaraq saxtakarlığı boykot etmiş olacağıq. Nədən bunu etməyək ki?

Bunu hər kəs bir-birinə yaysın. Ümidliyəm ki, bunu bacara bilərik.

Zaqatala xalqına sevgi və saygılarımla Rəsul Mürsəlov.

QaynarXeber.Az    09.10.2015